O quanta, qualia sunt illa sabbata
Quæ semper celebrat superna curia
Quæ fessis requies, quæ merces fortibus
Cum erit omnia Deus in omnibus
Vere Ierusalem est illa civitas
Cuius pax iugis est, summa iucunditas
Ubi non prævenit rem desiderium
Nec desiderio minus est præmium
Quis rex, quæ curia, quale palatium
Quæ pax, quæ requies, quod illud gaudium
Huius participes exponant gloriam
Si quantum sentiunt, possint exprimere
Illic ex sabbato succedet sabbatum
Perpes lætitia sabbatizantium
Nec ineffabiles cessabunt iubili
Quos decantabimus et nos et angeli
Perenni Domino perpes sit gloria
Ex quo sunt, per quem sunt, in quo sunt omnia
Ex quo sunt, Pater est, per quem sunt, Filius
In quo sunt, Patris et Filii Spiritus