Testo e musica di Mario Incudine
Quantu si bedda misa a lu tilaru
Ca fai linzola di canapa e di linu,
quannu la guglia teni 'ntra li manu
di la to tila nesci oru finu.
Putissivu cusiri macari senza stigli
Senza ne lana, ne ditali e senza gugli,
li to capiddi fussiru lu filu,
e lu me visu tila ne tò manu.
Quantu si bedda assittata a lu tilaru
mentri cusi li linzola i linu finu,
un fazzulettu riccamatu a manu
ccu lu me nnomi quannu và luntanu.
E cusi sula tuttu lu curredu
Chistu sarà ppi tia lu me tisoru
E lu cupuni ora sutta 'nvelu,
ppi scupunarlu quannu ni maritamu.
'Nte sti linzola ci sarà misteru
quannu ne frazza tò si grapi u celu
ne stu cuscinu riccamatu a manu
ci posi a testa e i li capiddi d'oru.
Quantu si bedda misa a lu tilaru,
mentri canti ccu stu dialettu finu
mentri ccu l'occhi assicuti lu ricamu
di un gigliu e di 'na rosa di giardinu