U mondu hà fattu un altru ghjiru
À u spuntà di u to surrisu
Ùn aghju più trovu rifiatu
In circa di issi paradisa
Tù sè com'è una pitrata
Mi a' lasciatu u cori maccu
Ùn sò s'è tù ti rammenti
Quantu u mari chjachjaraia
Oghji innò !
Ùn voddu creda à i lamenta
È i sugnuzza di i frascaghji
Chì iddu si inchjocca à trascinà
U marosu chì mi batti u cori.
Luci quant'è petra fucaci
Chì lascia i steddi in l'ochja
A to boci mi si hè stampata
À l'orizonti di i notti
U mari t'avia purtatu
À a batticcia di i me ghjorna
Ti chjamu avà, ma ùn ci sè ;
Credu tù fussi solu un sognu
O zitedda,
Sè smarrita tempu vinuta
Mi sò brusgiati i palpebri
Circu à palponu a to vistica,
L'anima è l'ansciu di un affaccu.
Sè stata com'è una pitrata
Tirata in i me ghjorna losci
Ùn sò s'è tù ti rammenti
U versu di issu sirinatu, di quiddu sirinatu