Hè brusta 'ssa manata di versi paisani
Scritti in un linguaghju di Corsica suttana
Fatti par ramintà i scossi di l'anziani
In un mondu crudeli di quissa nova andana !
A brusta hè un focu ch'ùn voli micca mora
Com'ùn pudarà mora 'ss'isula tant'amata
Sè tutti i so fiddoli da drintu è da fora
L'aiutani à sfrancà si da 'ssa dura imbuscata !
Dumani suffiarà à nantu à quissa brusta
Un ventu d'aria pura vinutu da u cori
Chì darà nova fiamma à una zidda frusta
E chì farà pisà un'alba di splendori !
Dumani quissi casi chì oghji so sfraiati
Sarani dinò pieni di risa zitiddina
Quissi chjosi è 'ssi prati fin'avà tralasciati
Ùn timarani più d'andà à a ruvina !
Dumani a ghjuventù chì oghji s'addispera
Fighjularà l'avvena cantendu a so spiranza
E ni suminarà un'amicizia vera
Da induva nasciarà ghjustizia è fratiddanza !